🖋️कविता -" चुडिएको सपना "

कयौं 

आहुती दिएर

मेरो रित्तिएको कोख

भरिने वाला थियो,

मेरो गर्भमा हुर्किरहेको

सपनाले

आठौं महिना काटेर

विपनाको

आकृतिमा परिवर्तित

हुने दिन

नजिकिदै थियो,

तर

केही आफ्ना भनाउँदाले

जानीजानी बोक्न दिएको

र

मैले षडयन्त्र

नबुझी नजानी बोकेको

गर्हुङ्गो भार म भित्र हुर्किरहेको 

सपनाले 

खेप्न नसकेर

तुहियो,

तिनै सम्बन्धी 

जसले आफ्नो स्वार्थपुर्तीका लागि 

निर्दोष सपनाको

भ्रूण हत्या गरि

मेरो मुटुमा छुरी घोपे

आज शोक मनाउने हेतुले

आफ्नो दाग लागेको चरित्रलाई 

साधा स्वेत पहिरनले ढाकछोप गरि 

मेरो रगतले रङ्गिएको तन्ना वरिपरि

गोहीझै

सिकारपछि 

केही थोपा आँसु झारेर

सहानुभूति प्रदर्शन गर्न 

बसेको देखेर

मेरो आत्माले

तिनलाई धिक्कार्न थाल्यो,

अहिले पनि खुलेआम घुमिरहेछन

ती हत्याराहरु

बलि दिनलाई बाख्रा खोजिरहेछन

ती निर्दयीहरु

कसैको कोखमा हुर्किरहेको 

निर्दोष सपनाको 

हत्या गर्न तम्सिरहेछन

ती पापीहरु!

✍️ Dikshya Bhatta 

©️ Saahitya Manch Nepal & Writer